«Ме воштi бöръя вокöс…»

Водзын, кор кöсйöны вöлöм тöдмавны морт йылысь, медпервой юалöны оз нимсö сылысь, а рöдсö. Рöд нимыс пö сэсся ачыс ставсö висьталас. Сордйыв грездысь Поповъяслöн рöдыс заводитчöма öти попсянь (пыдiджык вужсö сэсся некод оз тöд). Попыдлöн вöлöма Митрей пи, Митрейлöн — Иван, Иванлöн — Семен, Семенлöн — Петыр, Петырлöн — Педот, Педотлöн — Вась. Буретш Педот Васьсянь и панам ми висьтнымöс. Чужлöма тайö мортыс Сордйыв грездын 1863 воын. Куим арöсöн кольöма батьтöг. Мамыскöд, Вась Таттянкöд, олöма пöльыс дорын, Семен Петыр ордын. А пöль кулöм бöрас — дядь дiнас, Петыр Епим ордын. Ачыс чужтiс-быдтiс да гöтырыскöд öтув кок вылас сувтöдiс öкмыс челядьöc. Со найö: Агния (чужлiс 1894 воын), Григорий (1895), Фёдор (1899), Анна (1901), Иван (1903), Василий (1904), Евдокия (1911), Афанасий (1913) да Павел (1915). Олöма ыджыд семья кык юкöна керкаын. Öтарас — тöвнас, мöдарас — гожöмнас. Керка саяс сулалöмаöсь конюшня да мöс-куклы гид-карта (нитш вылö кыпöдöм торъя жырйöн). Олан жырйын крöватьяс абу вöлöмаöсь. Челядь узьлöмаöсь пöлатьясын да джоджын (вольсавлöмаöсь гöн перина да кöр куяс). Семья некымынлаын вöдитöма гöран му, сиктсянь гоз-мöд километр сайын — турун пуктан видзьяс. Видзöмаöсь мöсъясöс, вöвъясöс, ыжъясöс. Быдтöмаöсь ид, сю, зöр, капуста, лук да с. в. Öти кывйöн, олöмаöсь сiдзи жö, кыдзи и мукöд йöзыс. Торъя гöльöсь либö озырöсь абу вöлöмаöсь. Медшöр озырлунныс – челядь. Öкмыс душ. Квайт пи да куим ныв. Зэв ён, дружнöй котыр. Овны да вывны эськö… Но олöмыс вöчис ас ногыс. Став мужичöй рöдыслöн (медiчöт Павелысь öтдор) олöмныc орис зэв водз. Сöмын семьяса медся главнöй мужичöй, Василий Федотович, олiс 74 арöсöдз (кувсис 1942 воын Котласын ныв дiнас олiгöн). Да медся ичöтыс, Павел Васильевич, бара жö 70 саяс арöсöдз олiс (кувсис во 5-6 сайын Украинаса Винница карын). А мукöд пияныc… На йылысь и сёрни. Медпервой олöмсьыс мyнic Фёдор, 1922 воын.

Фёдор

Фёдор Васильевич Попов (Вась Педöр) – республикаын нималана морт. Коми гижысь. Жаль, мый овны удайтчис вывтi этша. Но и тайö ичöт каднас Фёдорлы унатор олöмас веськалic. 1917 воын сiйöс босьтöны салдатöн империалистическöй война вылö. Служитiс румынскöй фронт вылын. Сэнi воштic дзоньвидзалунсö. Армияö мунтöдз велöдчис Помöсдiнса начальнöй школаын да Деревянскса второкласснöйын. Война вылысь локтöм бöрын помалiс Сыктывкарса педагогическöй техникум, уджалic народнöй образованиелöн Усть-Сысольскöй уезднöй отделын инструкторöн. Кувсис дзик виччысьтöг гортас, Сордйылын. Тайö кувсьöмыс став семьясö шöйöвоштлic. Фёдорлöн батьыс бöрыннас унаысь шулöма, мый тайö пиыслöн пö смертьыс орöдic сылысь олöм джынсö. Став семья пöвстын Федяöс сэк медъёна радейтлöмаöсь. Тадзи Педот Васьлöн рöдысь öти морт чинic. Олöмсьыс мунic том морт, империалистическöй войнаса фронтöвик. Тайö вöлi медводдза воштöм. А 1934 воын кувсис Педот Васьлöн мöд пи, Григорий.

Григорий

Сiйö вöлi семьяын медыджыд пиöн. Помöсдiнса школа помалöм бöрын, кыдзи и Фёдор, велöдчис Деревянскса второкласснöй школаын. 1915 воын Григорийöс босьтöны салдатöн империалистическöй война вылö. Öти кадö служитöны öти войскöвöй частьын Фёдор вокыскöд. 1918 воын локтö гортас, но регыд мысти бара мунö — Краснöй Армияö. 1921 воöдз кыссис сылöн салдатскöй службаыс. Гортö воöм бöрас дыр висьö малярияöн. 1925 воын мунö овны Кулöмдiнö. Зэв ёна отсасьö ичöтджык чой-воклы, видзö да велöдö найöс ас дiнас Кулöмдiнын. Григорийлöн кувсьöмыс вайис зэв ыджыд лёк семьялы. Босьтны кö ещö тöд вылö, мый таöдз неуна водзджык кувсис мамыс, Микита Öксинь, то позьö гöгöрвоны шоглысь ыдждасö… Со мый казьтывлö уна во мысти Павел Васильевич Попов, семьяысь медiчöт пи: «1933 вося ноябрын инсультысь кулi миян мам. Ме помнита, мый кувтöдзыс некымын во водзджык нин ciйö элясис сьöлöмувса дойяс вылö. Тайö гöгöрвоана, öд сiйö став олöмсö дугдывтöг уджалic, асывсянь войöдз. Неуна кö прöст кад лолic, мамö век вöлi кысьö либö вурсьö, и век бöрдö. Öтчыд Дуся юалic мамлысь: «Мамö, мыйла тэ бöрдан?» А мамö шуö: «Me ог бöрд, нылук, ме сьыла». «А мыйла тэнад синваыд петö?» «Да сьыланкывйыс татшöм». Мамö Кулöмдiнысь ылöджык некор эз и ветлыв. Сылöн эз коль ни öти фотокарточка, и ме öнi омöля нин помнита мамлысь чужöмсö. Гришакöд ми медбöръяысь аддзывлiм мамöс 1933 вося тулысын, кор воккöд öтлаын кайлiм пароходöн Помöсдiнöдз да олiм гортын дас лун. Бöр лэччигöн мамö колльöдiс миянöс Помöсдiнса пристаньöдз. Пароходсö виччысигмоз ми пукалiм кыр йылын, керъяс вылын, и мамö зэв дыр да нора бöрдic. Тыдалö, ciйö сьöлöмнас тöдiс нин, мый медбöръяысь аддзö медыджыд да медiчöт пиянсö. Ми пукалiм чöла да видзöдiм бöрдысь мам вылö. Ме эг бöрд сэки, кöть эськö и синва доршасис. Бöрыннас тыдовтчис, мый мамö бöрдic ас вöснаыс да Гриша вöcна. Во эз тыр мамö кулöм бöрын, кыдзи кувсис и Гриша. Öнi, 55 во кольöм бöрын, ме выльысь казьтывла тайö серпассö, и ачым бöрда…» Бырисны Педот Вась рöдысь кык пи, бырис и Педот Васьлöн гöтырыс… Кодi водзö? А водзö вöлi война. Страшнöй. Великöй Отечественнöй. Водзвыв шуам — война вылö мунiсны Педот Васьлöн нёльнан ловйöн кольöм пиыс: Вась, Иван, Афанасий да Павел. Мунiсны нёльöн, а бöрсö локтiс öтнас Павел. Война дырйи жö,1942 воын, кувсис и ачыс Педот Вась. Ыджыд рöд пасьмунiс. Колис сöмын паметь. Первойöн вошис Вась.

Василий

Василий чужлic вокъяс пиысь нёльöдöн 1904 воын. Гöтрасис да торъя керкаын овмöдчис. Тан жö, Сордйылын, рöдвужыскöд орччöн. 1925-1930-öд воясын пöшти став крестьянскöй уджыс усис сы вылö да Анна чой вылас. Мукöдыс велöдчисны. Но Вась некор абу элясьлöма сьöкыдлунъяс вылö, быдногыс отсалöма ичöтджык чой-вокыслы. Томулов петicны олöмас гра­мотнöй йöзöн. И таын зэв ыджыд пайыс Васьлöн. Уна буртор на эськö удитiс олöмас вöчны Вась, но ставсö дзугис война. Босьтöны сiйöс армияö 1941 вося октябрын. Первой веськалö Вӧлӧгода обласьтса Шексна станцияö. Сэсся — Архангельск обласьтö. 1942 вося май 5 лун. Евдокиялöн письмöысь (гижö Павеллы):

«… Ме зэв рад, мый пöлучитi тэнсьыд письмöястö. Тайö каднас уна выльтор чöжсис. Медводз висьтала, мый миян став вокным нин армияынӧсь. Медбöръяöн, март 4 лунö, босьтiсны Иванöс… Бöръя письмöсö сiйö гижö немечöн жугöдöм Клин карсянь. Афоня öнi Архангельскын, пöчтöвöй ящик 100. Василий — Архангельск обласьтын, Войвыв кöрт туйлöн Кадниковскöй разъезд. Сэн жö вöлöма Микайлö, но висьмöма… Лэдзöмаöсь гортас, но веськалöма больничаö да кувсьöма. Гуалöмаöсь ciйöc Василий, Миколай Епим да Ёгор Опонь…».

Армияын Василийöс вуджöдöны нöшта выль местаö — Ленинград обласьтö. Но коркö Вӧлӧгдасянь гортас воис телеграмма: «Локта гортö. Ёна вися». Тайö вöлi Вассянь бöръя юöртор. И мортыс — воши. Быттьö некор эз и вöвлы. Öнöдз некод оз тöд, кöнi бöръя олöм здуксö коллялic Педот Васьлöн нöшта öти пи, кытчö сiйöс гуалiсны…

Евдокиялöн письмöысь (1942 вося июль 15 лун.

Гижö действующöй армияö Павеллы):

«… Радио пыр передайтöны лёк юöръяс, мый миян бöрыньтчöны. Кöть и ми абу фронт вылын, но сiдз жö майшасям, олам öти эскöмöн — фашистъясöс вермöмöн. Бара думайтсьö Вася йылысь. Кытчö сiйö, коньöрöй, вошис, кор Вӧлӧгдасянь бöръяысь ceтic телеграмма. Либö куйлö кутшöмкö больничаын ёна висьысь, либö кулiс нин, и ас йывсьыс нинöм эз удит висьтавны… Вася кö öнi юöртiс, мый ловъя, ме эськö сiдзжö нимкодяси, кыдз нимкодяси сэк, кор дыр мысти воис тэнад письмöыд. Ме öд сэк думайтi жö, мый и тэ абу ловъя…».

 Но Василий эз юöрт. Рочöн шуöны: «Пропал без вести”. Война ньылыштiс нöшта öти мортöс. Вай кутам помнитны сы йылысь. А водзö вöлi – Иван.

Иван. 1940-öд вося гожöм. Геленджик.

Иван

Кыдз шулiм нин водзын, Иванöс босьтiсны армияö март 4 лунö. Грамотаа морт, 1920 воясын на помавлiс учительскöй семинария. Недыр олiс гортас, Сордйылын, а сэсся уджалiс уна грездын, гортсяньыс бокын. 1928 восянь военнöй служба нуис Кулöмдiнын, военкомат бердын. Сэк и гöтрасис. Бöрыннас вуджöдiсны Вöлöгдаö. Но кад мысти бöр локтö Кулöмдiнö. Кыдзи и пöшти став мужичöйыс, мунö Великöй Отечественнöй война вылö. 1942 вося апрель 9 лунö сiйö гижö Дуся чойыслы письмö:

«Дуня! Ыста ыджыд привет да сиа, мед öдйöджык бурдiн! Аски татысь вöрзям, ачыд тöдан кытчö – «гажаинö». Надейтча, мый коркö аддзысьлам на. Me ёнасö ог шогсьы, да и думайтны да шогсьыны кадыс абу. Письмö некодсянь на эз волы. Гижны кö кутан, ставыслы привет висьтав и юöрт менам мунöм йылысь. Адресöй: Макариха, 235 частьлöн транспортнöй рота».

Тайö письмöсö гижöм бöрын тöлысь да джын мысти Иван пöгибнитic. Педöт Васьлöн нöшта öти пиöн лоис этшаджык. Фронт вылын колисны кыкöн — Афанасий да Павел.

Дусялöн письмöысь (гижö 1942 вося октябрь 10 лунö Афанасийлы да Павеллы):

«Бур лун, менам дона вокъяс Афоня да Паша! Тöрыт воис Настясянь телеграмма. Сiйö висьталö, мый август 23 лунö Иванöс виöмаöсь. Кыв оз тырмы, мед висьтавны, кутшöм жаль миян дона ыджыд вокным! Нёль пиысь тi колинныд кыкöн.

Куслытöм паметь миян дона вокъяс Иванлы да Васьлы! Кутам дугдывтöг видзны асланым паметьын дона, радейтана вокъясöс, кодъяс пöгибнитiсны Рöдина вöсна. A тi, Афоня да Паша, босьтöй водзöс проклятöй гитлеровечьяслысь миян вокъяс вöсна. Некор ог вунöд, кыдзи Иван бöръясьыс мунiс миян дорысь, кыдзи прöщайтчис батькöд. Кöсйö нин вöлi мунны, но нöшта öтчыд бергöдчис, сывйыштiс да окыштiс менö да батьöс. Прöщайт пö, бать, колöкö, сэсся ог нин и аддзысьлöй. А бать шуö: «Мый тэ, господи помилуй, кыдз нö ог аддзысьлöй?» Кыкнанныслöн гöлöсъясыс дрöжжитiсны, и синваныс пeтic. Надейнö, кыкнанныс нин кылiсны, мый аддзысьöны бöръяысь…»

Кык смерть бöрын рöдвужлы коли сöмын öтитор: кевмыны Енлы, мед кöть нин Афанасий да Павел локтiсны гортаныс ловйöн. Но смертьыд абу на пöтöма. Сiйö кыйöдiс Афанасийöс.

Афанасий

Афанасий вöлi зэв бур педагогöн. Ыджыд буквасянь учительöн. 1926 восянь Афанасий Дуся чойыскöд (а 1927 восянь и Павелкöд) велöдчисны Кулöмдiнын, медыджыд вок Григорий дорын. 1930 воын, мöд ступеня школалысь 3 класс помалöм бöрын, Афанасий Дусякöд вуджöны велöдчыны Усть-Сысольскö. Афанасий пырö педучилищеö, а Дуся — медучилищеö. 1933 воын Афанасий Васильевич локтö гортас, уджалö Помöсдiнын учительöн. Сэсся сiйöс пуктöны роноса инспекторöн. Содö авторитет, йöзыс сiйöс зэв пыдди пуктöны. 1936 воын öти кадö Павел вокыскöд сiйöс босьтöны армияö. Но регыд мысти сьöлöм висьöм понда лэдзöны бöр. Афанасий Васильевич помалö Сыктывкарса учительскöй институт да бара заводитö уджавны Помöсдiнса школаын. Война вылö босьтöны 1941 воын. Военкоматсянь мöдöдöны командиръясöс дасьтан училищеö. Со мый сiйö гижö 1941 вося ноябрь 5 лунö Архангельсксянь:

«Чолöм, батьö, Дуня, Шура, Вовочка! Мöдöд вежон нин ме выль местаын — Архангельскын. Воим татчö 1941 вося октябрь 22 лунö. Веськалi училищеö, кытчö мöдöдicны военкоматсянь. Регыд мысти лоа Гöрд Армияса шöр командирöн. Тан шоныд, сöстöм, югыд… Вердöны бура. Сиа ставныдлы сöмын бурсö. Ме вöсна энö шогсьöй. Кöнi Паша? Гижлiс эз? Коля тiян пи да вок Афоня. Менам адрес: Архангельск кар, п/я 100».

А.В. Попов училищесö помалö 1943 вося февраль тöлысьын. Дуся чойыслы гижö: «16.2.43 г. Чукöрта ноп, мунам передöвöй линия вылö». А водзö вöлi фронт. Полевöй почта – 28280 — «Л». И письмö. Кутшöмкö Старостинсянь — Павеллы, действующöй армияö.

«Чолöм, Павлик!

Боевöй приветöн тiян дiнö Старостин… Висьтала тiянлы сьöкыд юöр. Тiян вок Афоня служитiс мекöд öти частьын. Ми вöлiм бур ёртъясöн. Боевöй задание олöмö пöртiгöн Афанасий Васильевич пöгибнитiс геройскöй смертьöн. Ми воштiм сюсь, боевöй да повтöм командирöс. Медбур ёрт понда ми враглысь босьтам на водзöс. Ми гуалiм Афанасийöс салютöн, Власьевка сикт дорын… Сыкöд öтлаын гуалiм и ёртсö, кодкöд Афанасий тшöкыда сёрнитлывлic аскиа олöм йылысь. Афоня да Сергей пыр кутасны овны миян паметьын…»

Со тадз. Страшнöй юöр. Фронт вылын та бöрын колис cöмын öтнас Павел. Педот Вась рöд дзикöдз чинic.

Павел гижö Дуся чойыслы (1943 во, ноябрь 7 лун):

«…Войдöрлун рытнас вайисны фронтсянь письмö, кöн гижöмаöсь страшнöй юöр. Пöгибнитöма Афоня. Талун ме гижа та йылысь, а тöрыт — эг вермы. Ми воштiм Афоняöс! Ме воштi медбöръя вокöс! Тэ, Дуся, медся бура тöдан менö да Афоняöс, и гöгöрвоан, кутшöм миянлы тайö воштöмыс. Кутшöм сьöкыд! Тöрыт ме рытывбыд бöрдi. А талун синъяс косöсь. Тöда, мый и тэ öнi письмö лыддигас бöрдан. Бöрд, чоюк, пальöдышт шогтö… Öтитор юрын: эз ло Афоня, эз ло Вася, эз ло Иван, эз лоны бать да унаöн мукöд. Войнаöдз на ми олiм куим чой да нёль вок. Этшаöн олiсны сэтшöм дружнöя, кыдзи ми… Мед кö öнi сьöкыд, ми венам ставсö. Кутчысь, Дуня. Ог кутöй сёрнитны смерть йылысь. Кодi честнöя пöгибнитiс, сiйö эз кув. Сьöкыд лоö, гиж меным. Помнит, мый тэ абу öтнад…»

Павел

Павел колис ловйöн. Öтнас. Смертьыс, видзöдöмпырысь, пöтic. Павел Васильевич олic кузь нэм, кувсис Украинаын, Винница карын. 1933 воын на помавлic миян районысь Уллянаса видз-му овмöс техникум. Первой уджавлic Сыктывкарын техник-топографöн. 1934 воын зэв ёна висьмис малярияöн да бöр локтiс Сордйылö, рöдвуж дiнас. Неуна бурдыштöм бöрын босьтчис велöдны Помöсдiнса шöр школаын ичöт классъяс, а бöрынджык 5-7 классъяс (роч да коми кыв). 1936 воö бось­тöны армияö. Сэтысь бöр локтöм бöрын Павел Васильевич кöcйöма учителявны Кулöмдiнын, но республикаса мин-прос мöдöдöма сiйöс Часово сиктö. Во уджалöм бöрын пырöма учительскöй институтö и бура сiйöс помалöма. А сэсся война…

И 1952 воын нин Павел Ва­сильевич мунöма овны да уджавны Украинаса Винница карö. 1988 воын аслас гижöдъясын казьтывлö:

«Война орöдiс олöмсö Иванлысь, Васялысь, Афонялысь. Кувсис бать. Василий Федото­вич Поповлöн (Педот Васьлöн) ыджыд семьяысь 1944 во кежлö колисны ловйöн менам чойяс — Анна, Агния да Дуся. Вокъяс пиысь коли ме öтнам. Судьба ме дiнö матыстчис бурджыка, менö пöщадитiс война, и ме дзоньвидзаöн локтi гортö… Меным зэв шог сыысь, мый чойяс кулöм бöрын ме коли медбöръяöн тайö ыджыд да дружнöй семьясьыс.1952 воын кувсис Анна чой, кодi миянлы вöлi мам пыдди. 1969 воын дыр висьöм бöрын кувсис Агния чой. Ми дыр на олiм Дусякöд, кöть öта-мöдысь зэв ылын, но — дружнöя. Ми унаысь волiм Кулöмдiнö, кöн коркö овлiм Афонякöд да Гришакöд. Ми дыр овлiм Помöсдiнын да Сорд­йылын, менам Васьö воклöн Евдокия гöтыр да сылöн челядь ордын. Миянлы сэн ставыс дона! Но куим во сайын кувсис и Дуся… Öнi ме ола сöмын нин важ думъясöн. Ме пöрысь нин. Пемдö син. Но ме век коля Пе­дот Вась рöдын. Кыдзи колясны менам чойяс да вокъяс. Кыдзи колясны внукъяс да внучкаяс…».

Со татшöм сёрни миян артмис, дона лыддьысьысь. Вай кутам помнитны: «Некод эз вун, нинöм эз вун». Вай кутам пом­нитны Педот Васьлысь рöд, и мукöд рöдъяс, кодъясöс пасьвapтic сьöкыд олöм да война. Важас — миян аскиа луныслöн подулыс.

А.ШЕБЫРЕВ.

Автор аттьöалö Сордйыв грездысь М.В. Ефремоваöс материал дасьтiгöн

отсöг сетöмысь.

Шебырев, А. «Ме воштi бöръя вокöс…» / [дасьтiс] А. Шебырев // Парма гор. – 1999. – Январ 14 лун (4 №). – 5 л.б.

Воспоминания сестры Евдокии Васильевны о братьях, солдатах-фронтовиках, уроженцах деревни Сордйыв Усть-Куломского района, участниках империалистической войны Фёдоре Васильевиче и Григории Васильевиче, участниках Великой Отечественной войны Василии Васильевиче, Иване Васильевиче и Павле Васильевиче Поповых.